Қала әкімі мүгедек балаларды оңалту орталығына барды

Қалалық әкімдік мүгедек балаларды оңалту орталығына қосымша ғимарат, қажет болса жер бөлуге дайын. Бұл туралы шаһар басшысы Ерхан Омаров кеше «Жайна» оңалту орталығында болған кезінде айтты. Әкім мекемеде ем қабылдап жүрген балалардың хал-жағдайын біліп, сауықтыру орнының мүмкіндіктерімен танысты. Бүлдіршіндердің еміне тағы қандай құралдар қажет екенін сұрады. «Жайна» мүгедек балаларды оңалту орталығының жетекшісі Нұрила Жарболова науқас балаларға көрсетілетін көмек тізімін көбейткісі келеді. Ол ойындағы осы жоспарларын шаһар басшысына жеткізді. Қалада қазір 1 мың 235 мүмкіндігі шектеулі бала бар. Әлеуметтік бағдарламалар бөлімі 40 балаға сурдопедагог, жүріп-тұруы қиын 71 жеткіншекке жеке көмекші тағайындаған.