Денесінің 90 пайызы қабыршақтанып кеткен кішкентай Жасұланның ең үлкен арманы орындалды

Ал, туа бітті ихтиоз ауруына шалдығып, денесінің 90 пайызы қабыршақтанып кеткен кішкентай Жасұланның ең үлкен арманы орындалды. Ол өзі жатқан ауруханада сүйікті әншісі Қайрат Нұртаспен жолықты. Бүлдіршіннің арманы болған әнші науқас баланы өзі іздеп келген. Қуанышы қойнына сыймаған Жасұлан Қайратпен бірге ән шырқады. Алладан шипа сұрап жүрген бүлдіршіннің "Қайратты көрсем" деген арманы осылайша тез орындалатынына Жасұлан түгілі оның ата-анасы да сенбеген. Алайда, Қайрат Нұртас онсыз да көңіліне қаяу түскен Жасұланның бала арманынан аттап өте алмапты. Кішкене сыйлығы мен қаржылай көмегін ала келген Қайрат Нұртас балақайдың орындауында өзінің әндерін тыңдап, бүлдіршінмен сұхбаттасып қайтты. Ал, бұған дейін аурумен туған баланы қолдау мақсатында қазақ эстрада жұлдыздары қайырымдылық кеш өткізген еді. Бүгінде Жасұланның еміне 6 миллион теңге жиналды.