འབའ་རོམ་པའི་སྐྱེས་རབས་གསོལ་འདེབས

ཚེ་འདི་བློས་བཏང་དབེན་པའི་རི་ལ་སྙེགས། །འཇིག་རྟེན་འཁོར་བའི་འདམ་གྱི་མ་གོས་ཞིང་། །རང་གཞན་དོན་གཉིས་སྒྲུབ་པ་འབའ་རོམ་པའི། །གྲུབ་བརྙེས་གོང་མ་རྣམས་ལ་སྙིང་ནས་འདུད།། ཞེས་མཆོད་པར་བརྗོད་ནས་དཔལ་ལྡན་འབའ་རོམ་བཀའ་བརྒྱུད་ཀྱི་ལོ་རྒྱུས་མདོར་ཙམ་སྨོས་ན། རྗེ་དྭགས་པོ་རིན་པོ་ཆེའི་རྒྱུད་འཛིན་གྱི་སྲས་བཞི་ཡི་མཆོག་ཏུ་གྱུར་པ་རྗེ་འབའ་རོམ་པ་དར་མ་དབང་ཕྱུག་མཆོག་ནི་རབ་བྱུང་གཉིས་པའི་མེ་ལུག་༡༡༢༧ལ་འཕན་ཡུལ་ལུང་བ་བྱ་བར་སྐུ་འཁྲུངས། དགུང་ལོ་བདུན་གྱི་དུས་མཁའ་འགྲོ་མས་རྒྱུད་བསྐུལ་བས་རྗེ་དྭགས་པོ་རིན་པོ་ཆེ་མཇལ་འདོད་པ་བྱུང་། དགུང་ལོ་བརྒྱད་ལ་མཁན་པོ་སྐ་བ་པ་དང་སློབ་དཔོན་དབང་ཕྱུག་གཞོན་ནུ་གཉིས་ལས་རབ་ཏུ་བྱུང་། མཚན་དར་མ་དབང་ཕྱུག་ཏུ་གསོལ། དེ་ནས་སྤྲུལ་པའི་རྣལ་འབྱོར་པ་གཅིག་གིས་དྭགས་པོ་རིན་པོ་ཆེ་ལ་སྔགས་པ་དུ་མ་མཛད་ནས་སྒམ་པོར་ཁྲིད་དེ་མི་སྣང་བར་སོང་། ཆོས་རྗེ་རིན་པོ་ཆེ་མཇལ། རྒྱུན་ཏུ་ཆོས་རྗེ་རིན་པོ་ཆེའི་ཆིབས་ཁ་བ་མཛད། རིན་པོ་ཆེའི་སྐུ་སྲོག་གི་བར་ཆད་ཆེན་པོ་བཞི་བསལ། སྐུ་མ་གཤེགས་བར་ཞབས་རྟོགས་སྒྲུབ་ཞིང་གདམ་ངག་མངས་དུ་ཞུས། ཉམས་རྟོགས་ཁྱད་པར་ཅན་ཐུགས་ལ་འཁྲུངས། མཐར་བླ་མའི་གསུངས་བཞིན་བྱང་འབའ་རོམ་དུ་བྱོན་ནས་ལོ་གཅིག་སྒྲུབ་ལ་གཞོལ་བ་སོགས་ཀྱི་སྒོ་ནས་མི་དང་མི་མིན་གྱི་དོན་མཐའ་ཡས་པ་མཛད། མཐར་དགུང་ལོ་བདུན་བཅུ་རྩ་གཉིས་ས་རི་ཟླ་བའི་ཚེས་གཉིས་ཀྱི་ནུབ་མོ་སྐུ་མྱ་ངན་ལས་འདས། མཛད་ཆོས་ཆོས་དྲུག་ཁྲིད་ཡིག་གནད་ཆོས་བཅུ་གསུམ་སོགས་མང་དུ་མཛད། སློབ་མ་བུ་ཆེན་བཞི་དང་ཐུགས་སྲས་བཞི་རྒྱུད་འཛིན་གྱི་སྲས་གཉིས་སོགས་བགྲང་གིས་མི་ལང་པ་བྱོན་པའོ། །།