«Тур де Франс» көпкүндігі шарықтау шегіне жетті

Жексенбі күні Парижде биылғы Гран-тур сайысы мәресіне жетеді. Егер бүгін-ертең Кристофер Фрум құлап қалмаса, британдық велоспортшы «Тур де Франста» топ жарады. 186 шақырымдық 18-ші кезеңде француз спортшылары көзге түсті. Ромен Барде кезең жеңімпазы атанса, оның отандасы Пьер Роллан екінші болып жарысты аяқтады. «Астана» сапынан Якоб Фульсанг бесінші орыннан көрінді. Таулы қыраттардағы тас жолда даниялық велошабандоз біразға дейін топ бастаған. Алайда орта жолда Фульсангты көлік қағып кетіп, «астаналық» спортшы уақыт жоғалтып алды. 18-ші кезеңнен кейін Крис Фрум, Наиро Кинтана және Алехандро Вальверде үштігі алда келеді. Винченсо Нибали жетінші орында тұр.