Қазақ ұлттық аграрлық университетіне 85 жыл болды

Отандық ауыл шаруашылығы білім мен ғылымының қара шаңырағы Қазақ ұлттық аграрлық университетіне - 85 жыл. Мерейтойға орай Алматыда «Агроөнеркәсіп кешенін дамытудағы ғылым мен білімнің басым бағыттарының жаңа стратегиясы» атты халықаралық ғылыми-тәжірибелік конференция өтті. Конференция ауыл шаруашылық өнімдерінің көрмесімен басталды. Дәнді-дақылдардың, көкөністің жаңа сұрыптары, дайын өнімдер мен озық технологиялар көпшілік назарына ұсынылды. Бұл өнімдердің әрқайсысында университет түлектерінің үлесі бар екені анық. Теміржан Айтбаев, Қазақ картоп және көкөніс шаруашылығы ҒЗИ директоры -Біздің институтымыз картоп, көкөніс дақылдарының 25 түрі бойынша 140-тан астам жаңа сорттар шығарды. Бүгінгі таңда Қазақстанда 45 жаңа сорт будандастырылған. Біздің жаңа жетістігіміздің бірі – осы картопты биотехнологиялық әдіспен тұқымын көбейту, сауықтыру. Қазақ ұлттық аграрлық университеті 2010 жылдан бері ұлттық зерттеу университетіне трансформацялауға ден қойып отыр. Мұндағы мақсат – аграрлық ғылым, бизнес және өндірістің басын қосу. Тілектес Есполов, Қазақ ұлттық аграрлық университетінің ректоры -Ұлттық зерттеу университетіне трансформациялану кезінде заман талабына сай бүгінгі нарыққа бейімделуіміз керек. Біз мемлекетке масыл болмауымыз керек.