E-Islam ғаламтор порталы жүзеге аспақ

Келер жылдан бастап, E-Islam ғаламтор порталы іске қосылады. Мақсат -- дәстүрлі исламның ханафилік мазхабын, байсалды ислам негіздерін түсіндіру, жастарды исламның рухани-мәдени құндылықтарына баулу. Саны көп, мазмұны бір сайттардан бұл сайт жаңалықтар блогы уақтылы жаңартылып отыратындығымен ерекшеленеді. Онлайн-кітапхана, рухани білім беру, діни мейрамдардың мәнін ұқтыру, мұсылман асханасы, бала тәрбиесі сынды мәліметтер қамтылмақ. Бұдан бөлек, бүлдіршіндерге арналған мұсылман әдебін насихаттайтын мультфильм дайындалатын болады. Тіпті Ислам радиотелеарнасын ашу жоспарда бар. Бұл туралы Елордадағы бүгін Ұлттық кітапханада өткен дөңгелек үстел отырысында айтылды.