Жекпе-жек шеберлері Сочиге аттанады

«Алаш Прайд» кәсіпқой спорт клубында жаттығатын ережесіз жекпе-жектің мықтылары дайындық жұмыстарын пысықтауда. Жыл соңына дейін бір емес бірнеше жарыс өтеді деп жоспарлануда. Шілденің 31-і Ресейдің Сочи қаласында сегізбұрыштың серкелері бас қосады. Атап айтар болсақ, Виталий Минаков пен Али Багаутинов, Мурад Мачаев пен Руслан Магомедов секілді сайыпқыран жігіттер өз шеберліктерін паш етеді. Бұл жарыста Қазақ елінің намысын Аслан Тоқтарбаев пен Евгений Егембердиев қорғайды. Жерлестеріміздің қарсыластары белгілі. Аслан дағыстандық Құрбан Гаджиевпен күш сынасса, жақында ғана америкалық Джеф Монсонның осал тұсын тапқан Евгений Егембердиев ресейлік Сергей Павловичпен айқасқа түседі. Сочиде өтетін дәстүрлі халықаралық турнирде Ерлан Тілеумбетов пен Махир Мамедов те өнер көрсетеді.