Вотка карын удмурт кылэз дышетон

20 ар талэсь азьло Вотка карысь 1-тӥ школаын дышетон программае пыртӥзы удмурт кылэз. 9-тӥ классозь пиналъёс сое дышетӥзы но тодон-валанъёс басьтӥзы. 3 ар талэсь азьло, дышетон кун стандартъя, полинациональной классъёс кылдӥзы. Кыӵе емышъёсыз со выльдӥськонлэн - Светлана Добряковалэн возьматоназ. Воткаысь 1-тӥ школаын удмурт кылэз дышетон кутскиз ӵапак Валентина Черыгова бордысен. Карысь "Удмурт кенеш" огазеяськонлэн кивалтӥсез школалэн администрациезлы валэктыны быгатӥз удмурт кыллэн кулэлыкез сярысь. Табере тани 20 арзэ ини татын анай кыл дышетон программае пыртэмын. Но таӵе мыло-кыдо нылпиос школаын трос ӧвӧл. 3 ар талэсь азьло классъёсты полинациональной каризы. ВАЛЕНТИНА ЧЕРЫГОВА, ВОТКАЫСЬ 1-ТӤ ШКОЛАЫСЬ ПОКЧИ КЛАССЪЁСТЫ ДЫШЕТӤСЬ: «Полинациональной классъёс кылдытэмын. Со туж ик умой ӧвӧл, ӝыныез дышетэ класс, ӝыныез - уг. Дышетоно ке, ваньмызлы дышетыны кулэ. Со адӟиське - нокинлы но со уг кельшы». Та школаысь дышетӥсьёс трос нюръяськоно луизы. Соослэн тыршеменызы али 5-тӥ классозь удмурт кылэз быдэс класс дышетэ, мукетъёсыз 9-тӥ классозь - ог люкетэз. Валамон ини, таӵе амалэн удмурт кылэз дышетон аслэсьтыз емышъёссэ возьматэ. ВАЛЕНТИНА ЧЕРЫГОВА, ВОТКАЫСЬ 1-ТӤ ШКОЛАЫСЬ ПОКЧИ КЛАССЪЁСТЫ ДЫШЕТӤСЬ: «Если вань классъёсын дышетысалзы ке удмурт кылэз, кызьы бигер кылэз Татарстанын дышето, соку со пыраклы мукет луысал. Кудӥз быгатэ вераськыны, солэн ассэ возьматэмез потысал, ассэ ачиз возьматыны мылкыдыз солэн луысал. А соос куспазы уг верасько ке, гуртысь лыктэмъёсыз но вунэтыны кутско». Туннэ Вотка карын удмурт кыл уг чузъяськы. Нырысетӥ школаысь удмурт кылъя дышетӥсьёс сюлмысь тыршо ке но. Югдур арысь аре умой пала уг воштӥськы. Та школаысь дышетӥсьёслэн 20 ар ӵоже тыршемзы токма медаз луы вылэм. Светлана Добрякова, Юрий Зелененький, «Мынам Удмуртие» телеканал