Ўзбекистон қайта Россиянинг таъсир доирасига тушиб қолиши мумкинми?

Расмий Тошкентнинг сўнгги йилларда Россия билан энергетика соҳасида ҳамкорликни янада кучайтириш саъй-ҳаракатлари ва режалари таҳлилчилар орасида ҳудди шу каби фикрларни пайдо қилмай қўймаган. Жумладан, президент Шавкат Мирзиёев ўзининг расмий нутқида кеча Бухорода ишга тушган “Қандим газни қайта ишлаш мажмуаси Ўзбекистон билан Россия ҳамкорлигининг ёрқин намунаси” эканини қайд этган. Мажмуа Ўзбекистоннинг “Ўзбекнефтгаз” ва Россиянинг “Лукойл” компаниялари ҳамкорлигида барпо этилган. Ўзбекистондаги podrobno.uz интернет нашрининг мамлакат раҳбарининг Бухородаги тантанали очилиш маросими чоғида қилган нутқига таяниб ёзишича, Ўзбекистон жорий йилда Россия билан атом электр станцияси қурилиши бўйича келишувни имзолашга ҳам умид қилмоқда. Айрим сиёсий таҳлилчиларга кўра, Россия Федерацияси Украина инқирозидан кейин ўзининг постсовет ҳудудидаги сиёсатини бошқа бир ўзанга йўналтиришга ҳаракат қилаяпти. “Яъни, имконқадар босимлар сиёсатини чеклаб, иқтисодий боғлиқликни кучайтириш”, - дейди, жумладан, Франциядан сиёсий таҳлилчи Камолиддин Раббимов. Би-би-си Ўзбек хизматининг видеоларини www.bbcuzbek.com да ҳам кўришингиз мумкин.