Мэҥэ-Хаҥалас улуустааҕы библиотекаҕа Иннокентий Сосин аатын иҥэрдилэр

Мэҥэ-Хаҥалас улууһун Майа сэлиэнньэтигэр улуустааҕы киин библиотека 80 сылын бэлиэтээтэ, ону тэҥэ СР культуратын үтүөлээх үлэһитэ, Россия суруйааччыларын союзтарын чилиэнэ, поэт, прозаик Иннокентий Сосин аатын библиотекаҕа үөрүүлээх быһыыга иҥэрдилэр. Иннокентий Михайлович Сосин айар үлэтин ырыанньык-поэт быһыытынан 1950 сылтан ыла саҕалаан, кини Мэҥэ-Хаҥалас оройуонун, Тараҕай нэһилиэгин Өрөгөй ырыаларын уонна да атын 60-ча хоһоонноро саха тыллаах барыта ыллыыр ырыаларын суруйан хаалларбыта. 70 сыллартан оҕоҕо аналлаах кэпсээннэринэн биллибитэ, кинини «Саха Бианкита» диэн ааттыыллара. Улуус историятын үйэтитиитигэр сүнкэн кылаатын киллэрбит киһинэн буолар. Кини олорбут дьиэтигэр мемориальнай дуоска ыйанан турар. Онтон бүгүн кини аата улуустааҕы библиотекаҕа иҥэриллибитэ өссө биир улахан үөрүүнэн буолар. Мэҥэ-Хаҥалас улууһун киин библиотекатын 80 сыллаах үбүлүөйүгэр ыҥырыллан кэлбит илин эҥэр улуустарын библиотека ситимин үлэһиттэрэ, улууспутугар олорор, үлэлиир суруйааччылар кэлэн бэйэлэрин санааларын эттилэр. Бу күн «Иэйии биһигэ» диэн ааттаммыт литературно–музыкальнай салон аһыллан Иннокентий Сосин ырыаларын, хоһооннорун толорон төгүрүк остуол тула кэпсэтэн, ахтан-санаан аастылар, итиэннэ инникитин Иннокентий Михайлович аатын үйэтитэргэ өссө да элбэх былааннар олоххо киирэллэрэ күүтүллэр.