Интерпол Тошкент ваколатхонасининг собиқ раҳбари Юрий Савинков қўлга олинди

Интерполнинг Ўзбекистондаги ваколатхонаси собиқ бошлиғи¸ МХХ полковниги ва тадбиркор, 56 яшар Юрий Николаевич Савинков Тошкент талаби билан Россияда қўлга олинди. Савинков Ўзбекистон бош прокуратураси тарафидан қидирувга берилган эди. Озодликнинг Ўзбекистон ҳуқуқ-тартибот органларидаги манбаларига кўра¸ Юрий Савинков ноқонуний тадбиркорлик¸ катта миқдордаги валютани давлат чегарасидан изнсиз ўтказиш¸ ҳизмат ваколатларини суиистеъмол қилиш ва коррупцияда айбланмоқда. Ўзбекистон Миллий хавфсизлик хизмати полковниги ва мамлакатни Интерполда тамсил этган мулозимнинг қидирув ортидан Москвада қўлга олинганлиги тўғрисидаги иддаоларни бир-биридан мустақил бир нечта манба Озодлик билан ўзаро суҳбатда илгари сурди. "Юрий Николаевич Савинков 17 август, душанба куни Москвада қўлга олинди. Ўзбекистон Бош прокуратураси Минск келишуви бўйича Россия ҳуқуқ-тартибот органларига экстарадиция сўрови юборган. Сўров ҳужжатига Савинковнинг Ўзбекистонга ускуналар жўнатиш ниқоби остида пул ювиш билан шуғулланганлиги ва катта миқдордаги валютани ўзлаштирганига оид айбномалар илова қилинган. Бу ҳужжатлар асосида Россия ҳуқуқ-тартибот органларни Савинковни ҳибсга олди. Яна бир нарсани ҳам қўшиб қўйсам¸ Савинков Интерполнинг Ўзбекистондаги ваколатхонасида ишлаган пайтида ҳизмат ваколатини суиистеъмол қилганликда ҳам айбланмоқда. Бу жиддий айблов”¸ деди Озодликнинг Ўзбекистон ҳуқуқ-тартибот органларидаги манбаси.