Егит удмурт гожъяськисъёс пӧлын кылбурет баттл радъяськиз

Тунсыко, шумприч, туала. Нырысьсэ егит удмурт гожъяськисъёс пӧлын кылбурет баттл радъяськиз. Ужрадын кык команда пумиськиз - Удмурт кун университетысь студентъёс но Кузёбай Герд нимо гимназиын дышетскисьёс. Пӧсь пумиськонэ вуылӥз Надежда Николаева. Тазьы - кылбуръёсты та дырозь нокин но ӧз лыдӧы на, дыр. Туала сямен ас мылкыдзэс, пуш дуннезэс возьматыны Кузёбай Герд нимо гимназиысь дышетскисьёс но удмурт кун университетысь студентъёс люкаськизы. Дарья Шиляева - ӟуч, удмурт кылэз гимназиын дышетӥз но кылбур гожъяны кутскиз. Али нылашлэн пичи книгаез потэмын. Баттлэ тужгес усто кылбуръёссэ бырйиз. ДАРЬЯ ШИЛЯЕВА, КУЗЁБАЙ ГЕРД НИМО ГИМНАЗИЫН ДЫШЕТСКИСЬ: «Туннэ кылбуръёсмы пӧртэм темаосъя дасямын командамылэн, мон верасько, малпанэлэм сопал дораз вуи ке темая, мон малпасько со туж герӟаськемын кыӵе ке улон философиен, со сярысь кылбурме ик мон лыдӟо». Туала удмурт кылбур туж аспӧртэмлыко. Тросэз егит кылбурчиос рифмаез тӥяса гожъясько. Воштӥськытэк кылемын кылбурлэн пуштросэз - егитъёсты сюлмаськытэ яратон, семья кусыпъёс, улон радлык. БОГДАН АНФИНОГЕНОВ, КЫЛБУРЧИ: «Туннэ нуналлы егитъёс туж трос гожъяло, но туж умой пӧрме, мон малпасько, туала удмурт егит поэзия азьланьтӥське, и со туж тунсыко, туж туала». Егит авторъёслэн нимысьтыз бичетъёс поттыны луонлыксы ӵемысь ӧвӧл. Соин ик вань удмурт егит поэзия интернетын азинске. Нош таӵе баттлъёс егитъёслэсь нимъёссэ калык пӧлы вӧлмытыны юртто. ВИКТОР ШИБАНОВ, КЫЛБУРЧИ, КЫЛБУРЕТ БАТТЛЭЗ ДУНЪЯСЬ : «Кинъёс гожъясько, дӥсьто калык азе потыны, соослы люкетыны кулэ ӧвӧл, малы ке шуоно, кылбур - со сюлэм пушкын маке улӥсь, сое калык пушкы поттӥськод и тонэ шукко ке, то умой ӧвӧл, дыр, татын одно ик умой палзэ адӟыны тыршоно». Ужрадын егит кылбурчиос пӧртэм темаосъя гожтэм ужъёссэс лыдӟизы, интыязы ик выль чуръёс но акрокылбуръёс малпазы, но ас гожтэм кырӟанъёссэс быдэсъязы. Вормисе потӥзы Кузёбай Герд гимназиысь пиналъёс. Нош тужгес усто кылбурчи ним УДГУ-ын дышетскись Алексей Пикулев утӥз. Надежда Николаева, Илья Дерендяев «Мынам Удмуртие» телеканал