བོད་ཀྱི་མི་རབས་གསར་བའི་མཐུན་ཚོགས་ ཚུགས་ནས་ལོ་གཉིས་འཁོར་བའི་དུས་དྲན་ལེའུ་ ༢༽

ཕྱི་ལོ ༢༠༡༣ ལོའི་ཟླ ༧ ཚེས་༧ ཉིན་བོད་ཀྱི་མི་རབས་གསར་བའི་མཐུན་ཚོགས་ཚུགས་ནས་ལོ་གཉིས་འཁོར་བའི་དུས་དྲན་དང་ལོ་འཁོར་ཚོགས་ཆེན་ཐེངས་གཉིས་པའི་ཐོག ཡུ་རོབ་སྤྱི་ཟུར་རྣམ་པ་དང་། ཆོལ་ཀ་གསུམ་གྱི་ཚོགས་གཙོ་རྣམ་པ། དེ་བཞིན་བོད་ཀྱི་མི་རབས་གསར་བའི་ཚོགས་མི་ལྷན་རྒྱས་བཅས་མཉམ་ཞུགས་གནང་ཡོད། སྔ་དྲོའི་མཛད་རིམ་ནང་སྐུ་མགྲོན་རྣམས་ཀྱིས་ཚོགས་ཆེན་དང་འབྲེལ་བའི་ལམ་སྟོན་བཀའ་སློབ་ཀྱི་བཀའ་དྲིན་སྐྱོང་གནང་བ་དང་། དེ་བཞིན་བོད་ཀྱི་མི་རབས་གསར་བའི་མཐུན་ཚོགས་བཙུགས་ནས་མི་ལོ་གཉིས་ལྷག་གི་རིང་ལས་འགུལ་སྤེལ་ཕྱོགས་ཐད་ནོར་འཁྲུལ་འཐུས་ཤོར་ཁག་ཅི་ཡོད་དང་། བོད་ཀྱི་མི་རབས་གསར་བའི་མཐུན་ཚོགས་ཀྱི་རྒྱུན་ལས་རྣམ་གྱིས་གཙོས་ཚོགས་མི་ལྷན་རྒྱས་ཀྱིས་མཐུན་ལམ་རྡོག་རྩ་གཅིག་སྒྲིལ་ཐོག་མ་འོངས་པར་མུ་མཐུད་ལས་དོན་ཆེད་གདོང་ལེན་ཅི་དགོས་ཁག་གསལ་འདོན་བཅས་གནང་། ཕྱི་དྲོའི་མཛད་རིམ་ནང་བོད་ཀྱི་མི་རབས་གསར་བའི་མཐུན་ཚོགས་ཀྱི་ཚོགས་མི་ལྷན་རྒྱས་ཀྱིས་མཐུན་ཚོགས་ཀྱི་སྒྲིག་གཞི་བསྐྱར་བཅོས་གཏན་འབེབས་དང་། མ་འོངས་ལས་འཆར་ཁག་ཅི་དགོས་གྲོས་བསྡུར་གང་ལེགས་མཛད།