АҚШ Сурияга ҳарбий куч ишлатиш билан таҳдид қилмоқда

АҚШ президенти Доналд Трамп ўтган ҳафтада Сурияда тинч аҳолига қарши кимёвий қурол қўллангани ҳақидаги иддаолар пайдо бўлиши ортидан ушбу мамлакатга ҳарбий куч ишлатиш билан таҳдид қилди. Айни дамда Россия бундай амалиёт "оғир оқибатларга олиб келиши мумкинлиги"дан огоҳлантирди. Трамп 9 апрелда АҚШ ҳарбий маслаҳатчилари билан учрашуви чоғида шундай деди: − Бу ишни албатта қиламиз, куч ишлатиб бўлса ҳам қиламиз Қарорни бугун (9 апрель) ёки тез орада қабул қиламиз. Қарор сизларга албатта етказилади. Барчамиз кўриб турган ваҳшийликка ортиқ чидаб бўлмайди. Бу – даҳшат. Биз бунга томошабин бўлиб қараб тура олмаймиз. У қайтарилмаслиги керак. АҚШ қудрати, мамлакатимиз кучи уни тўхтатишга қодир бўла туриб, бунга йўл қўйиб бўлмайди. Ўша куни АҚШ президенти Франция президенти Эммануэл Макрон билан ушбу масалани муҳокама қилди ва томонлар кимёвий қурол билан қилинган ҳужумга “муносиб жавоб қайтариш”га келишиб олгани ҳақида Макрон девони хабар берди. Трамп олдинроқ 7 апрелда уюштирилгани гумон қилинаётган кимёвий ҳужум учун Суриянинг иттифоқчилари Россия билан Эрон ҳам жавобгар экани ҳақида баёнот берган эди.